داشلیجا
چوخ مشتاقام وطنیمده گزمه گه
سال دوزلارین* ال داشیندا ازمه گه
سوتو ساغیب کوپه لره* سوزمه گه
کوپه سیندی حیف سوتی جالاندی
فلک ووردی گوزل وطن تالاندی
سوتی ساغیب کوپه لره سوزن گون
قورودلاری چپیلره دوزن گون
اولمییدی کندیمدن اَل اوزن گون
او گونلردن کاش دانیشان اولیدی
غریبلردن حال سوروشان اولیدی
دویماق اولماز وطن سنون دادوننان
اینجیمدیک بولورسن هئچ زادوننان
دانیشاریخ شهرتوننن آدوننان
ای کاش دریا هر یئریوه دولماسین
ممان آدی هئچ وقت یالان اولماسین
چوخ ییردیک کره لرون یاغلارون
گاه گزردیک کهریز اوسته باغلارون
داشلیجادا* اوتایداکی داغلارون
داشلیجادا بولبولرون اوخوردی
قوشلار یازدا یواسینی توخوردی
یاز فصلینده کهریز آشیب داشاردی
سیلاب گلیب اوتای بوتای جوشاردی
کندین اهلی نه صفالی یاشاردی
هئچ بولمه دیک نه تئز گئچدی او زمان
چوخلار چئکدی فلک الیننن آمان
یاز اولاندا بار وئرردی بوداخلار
آغلیاردی او قورویان بولاخلار
گول قوراردی تنگه دکی اوشاخلار
غمله نیرم تنگه لرون بوش قالیب
بی رحم فلک بیزدن یامان کام آلیب
گوروم وطن دشمنلرون خوار اولسون
داغون داشون قیشدا یکسر قار اولسون
آغاجلارون یازدا دولو بار اولسون
ایسته گلیب بیر گون قوناقون اولاق
جوشا گلیب داشان بولاقون اولاق
خاطراتون هرگون یادا سالارام
اگر گلسم تورپاقووی یالارام
یاتانلارین إیین سننن آلارام
شاد اولسونلار تورپاقوندا ائولنلر
افسوس گئتدی خاطر حرمت بولنلر
فلک چوخلار ایاقینی باغلادی
فراقوندا اورکلری داغلادی
سننن اوتور گوزلریم چوخ آغلادی
گئجه گوندوز یوخلامادی گوزلریم
حیف اولسون غصه لیدی سوزلریم
زمستان87
[ جمعه 95/1/6 ] [ 11:29 عصر ] [ فهیمه اختیاری ممان ]
